الغراتان بالمقرونية من الجارة حنان التازية

وصفة أخرى من وصفات الجارة حنان التازية، الغراتان بالمقرونية لذيييييذ وغزال

الغراتان بالمقرونية

مقادير الغراتان بالمقرونية

نبدأ بمقادير الصوص

بصلة محكوكة
طماطم محكوكة على حسب الرغبة
2 فصوص ثوم محكوكين
قزبور ومعدنوس مقطعين رقاق
مطيشة ديال الحك
مطيشة ديال الكرطونة إلى عندك

التوابل : 
ملح، ابزار، شوية كمون، سكينجبير، كنور، 
شوية الجوزة محكوكة، شوية الزعتر محكوك،
زعفران

شوية ديال الهريسة، شوية ديال الزيت
الكفتة حسب الرغبة ( رابعة أو أكثر )

طريقة التحضير

كتشحري البصلة والثومة فقليل من الزيت
ثم تضيفين كل المقاير وقليييل من الماء وتخليها تشحر شوية
و تزيدي الكفتة وتحركيها حتى تفرتت وخليها تشحر 
صافي وطفي عليها

تنسلقو المقرونية ، أنا عملت المقرونية فماء ساخن وملح وشوية كنور والزبدة والزيت

ونخلويها تقطر فشي شبكة 

ومن بعد نخلطوها مع الصوص والكفتة

الآن، نوجدو لاصوص بيشاميل 
( ممكن تشريها واجدة، أنا تانعملها فالدار )

طريقة تحضير لاصوص بيشاميل

ربع لتر من الحليب
2 ملاعق زبدة
ملعقة كبيرة دقيق 
( أنا درت معلقة دقيق ومعلقة صغيرة مايزينة )
شوية ملح، ابزار، وشوية جوزة محكوكة

كنديرو الزبدة فوق نار مهيلة ذوب
ونزيدو الدقيق ونحركو بسرعة بملعقة خشبية 

منبعد نبداو نزيدو الحليب شوية بشوية والجوزة والابزار والملح 

ونحركو بسرعة منوقفوش وحنا تانزيدو الحليب ونحركو

حتى تغلي وتعقاد لينا ونحيدوها من فوق العافية

كاناخدو المول لي كيدخل للفرن ندهنوه بالزبدة وشوية البيشاميل 

كنديرو طبقة ديال المقرونية كخلطة بصوص الطماطم والكفتة 
وطبقة ديال الفرماج محكوك
وطبقة ديال البيشاميل

نعاودو نفس طريقة طبقة المقرونية وطبقة الفرماج

وكنغطيو بالبيشاميل مزيان ونرش الفرماج من الفوق

وندخلوها فالفرن تحمر شوية ونخرجوها

صافي، تنقطعو الغراتان مربعات تايبانو فيه خيوط الفروماج 

بالصحة والراحة الغراتان بالمقرونية جربوه راه غزااااااال

تقبل الله الصيام منا ومنكم

[author image=”https://lh6.googleusercontent.com/-J4AN6ByawQs/U8K1f0ugrSI/AAAAAAAAQ94/V7GCBD85yPw/s200/jara.png” ]جارتكم حنان التازية[/author]

8 تعليقات

ترك تعليق